हौली-हौली ब्हाऽ ही कन्नै बडले दी ठंड
चढ़दे पास्सै सूरज खलारै दा हा रंग ।
दूर डूंह्गी छवि मेरे हिरदै ही बस्सै दी
बल्लें-बल्लें जादू करियै दूर ही नस्सै दी
जादू आह्ले रंगै बिच नेहा में डुब्बी ‘आ
सोचें ते विचारें दे खोब्भे च खुब्भी ‘आ
हिरदै खुशी आह्ली उट्ठै करदी ही उमंग
हौली-हौली ब्हाऽ ही कन्नै बडले दी ठंड
चढ़दे पास्सै सूरज खलारै दा हा रंग ।
सोचें च ऐसा भलखोइयै में पेई ‘आ
न्हौन-धोन, पूजा-पाठ सब उत्थै रेही ‘आ
कांएं दी डुआरी बी ही बिच-बिच लब्भै दी
चिड़ियें दी काली ही लकीर बिच फब्बै दी
खुशी कन्नै नच्ची पेआ मेरा अंग - अंग
हौली-हौली ब्हाऽ ही कन्नै बडले दी ठंड
चढ़दे पास्सै सूरज खलारै दा हा रंग ।
मेरे पर जादू करियै दिलै जाऽ बसदी
दिखदे गै दिखदे झटपट ओह् जाऽ नसदी
नुहार सोह्नी दस्सियै ते मन ललचाइयै
दिखदे गै नस्सी गेई ओह् अक्खियां बचाइयै
दिक्खियै नजारा मन होई गेआ दंग
हौली-हौली ब्हाऽ ही कन्नै बडले दी ठंड
चढ़दे पास्सै सूरज खलारै दा हा रंग ।
जिंदु गी ही ठंड किश ठंड बी पजाऽ दी
हिरदै ही छवि ठंड मिट्ठी-मिट्ठी पा दी
झुसमुसे आह्ला जदूं गूढ़ा रंग म्हिसी ‘आ
औंदे गै लोई दे सनैह्री जाल बिछी ‘आ
मन करै दक्ख कदें होऐ निं एह् भंग
हौली-हौली ब्हाऽ ही कन्नै बडले दी ठंड
चढ़दे पास्सै सूरज खलारै दा हा रंग ।
गर्मी, सर्दी, पतझड़, होऐ भाएं बसैंत
बडलै ते सुहाना होऐ म्हौल अति ऐंत
सुहानी छवि बिच फ्ही माह्नू नेहा डु'ल्ली जाऽ
टकटकी लग्गै नेही सब रुत्तां भुल्ली जाऽ
दिक्खै जेह्ड़ा झलक उस्सी मनै च ब्हाली लै
अपने मनै गी नित्त बडलै ठुआली लै
बसाह् नेईं ओह् खा नित्त र'वै अंग-संग
हौली-हौली ब्हाऽ ही कन्नै बडले दी ठंड
चढ़दे पास्सै सूरज खलारै दा हा रंग ।
किन्ना बी ब्यान करां गल्ल निं गलोंदी ऐ
जि'यां -जि'यां मनै गी मसूस मिगी होंदी ऐ
कुदरत थमां समभाव रक्खना में सिक्खेआ
झुसमुसे आह्ला हा नजारा जदूं दिक्खेआ
पलै- खिनै बिच देई गई बेहद्द नंद
हौली-हौली ब्हाऽ ही कन्नै बडले दी ठंड
चढ़दे पास्सै सूरज खलारै दा हा रंग ।
मुल्लें निं जो थ्होंदा रंग उड्डै नित्त बडलै
दिक्खै जेह्ड़ा उट्ठै निं तां झट दक्ख बदलै
पक्खरुएं ब्हान्नै बाजां मारियै बुला 'रदी
सुन्ने शा बी मैंह्गा सुन्ना रोज ओह् खलारदी
लुट्टै उ'ऐ लुट्टने दा जेह्दे कश ऐ ढंग
हौली-हौली ब्हाऽ ही कन्नै बडले दी ठंड
चढ़दे पास्सै सूरज खलारै दा हा रंग ।
दक्ख दिलै छूहै जि’यां उ'आं जे लखोई जाऽ
छवि फ्ही स्थूल होई जाऽ, भाव संगड़ोई जाऽ
दि'ब्ब दक्ख दिलै राहें रुहै समाई जाऽ
दिलै दी निं पौंह्च जित्थै कि'यां थाह् पाई जाऽ
इस्सै सुर्गै बिच्चा निकली भागीरथी गंग
हौली-हौली ब्हाऽ ही कन्नै बडले दी ठंड
चढ़दे पास्सै सूरज खलारै दा हा रंग ।
