मां सरस्वती असेंगी अक्खरें दा ज्ञान दे
बास करियै कंठ साढ़ै,हर सभा च मान दे
मां सरस्वती असेंगी अक्खरें दा ज्ञान दे।
ज्ञान कला-विज्ञान सागर,तूं दया दी खान मां
मिशरी घोली दे सुरें च,करचै अस गुणगान मां
सरगमें च न्हाई उठचै,इन्ना मां बरदान दे
बास करियै कंठ साढ़ै, हर सभा च मान दे
मां सरस्वती असेंगी अक्खरें दा ज्ञान दे।
हैंस पर सुआरी करनी, टल्ले चिट्टे लान्नी मां
सोभदी हत्थें च वीणा, सभनें गी तूं भान्नी मां
ज्ञान दा भंडार साढ़ा, भर नमीं पन्छान दे
बास करियै कंठ साढ़ै, हर सभा च मान दे
मां सरस्वती असेंगी अक्खरें दा ज्ञान दे।
विद्या दी देवी तूं मां,तूं गै पालन हार मां
तुगी न सारे बराबर,सभनें नै तुगी प्यार मां
'रतन' दी सोभा तेरे नै,विद्या धन-धान दे
बास करियै कंठ साढ़ै, हर सभा च मान दे
मां सरस्वती असेंगी अक्खरें दा ज्ञान दे।
