चीजां घट्ट ते हिरख मता हा
साढ़ा बचपन बड़ा खरा हा ।
इक जना कमांदा हा ते सारें गी पतेआंदा हा
बड्डे बजुर्गें गी इज्जत देइयै थाह्रा सिर बठांदा हा
कमाई थोह्ड़ी ते खुशियां हियां मतियां
बड़े सम्मने हे पुत्तर ते धियां
सलूना इक बनांदे हे ते सारे हस्सी-हस्सी खंदे हे
चार परौह्ने उप्परा आई जान, रुट्टी बी बंडी लैंदे हे।
ए.सी-शेसी केह् होंदे कक्ख निं हा पता
दादी-दादे कन्नै मंजियां डाहियै कोठै लैंदे हे मजा
टिम-टिम करदे तारे दिक्खने
कन्नै गप्प-गड़ाके बज्जने
ठंडी ब्हाऊ दे लोआरें कन्नै
सराहियें दे पानी ठंडे करने
अंब चूपने, नंद मारने
कन्नै लस्सी दे ग्लास बी चाढ़ने।
फ्ही आई जाना भारा स्याला
कोठै पौना धुप्पै दा लशकरा
असें पानियां किकलियां
ते दादी ने रजाइयां निंगड़नियां
फुलबड़ियां, पापड़ घर गै बनने
कन्नै चारें दे डब्बे बी भरने।
कोठै जेल्लै तंदूर बालने
आले-दोआले गी आले बी मारने
ञ्यानें लेइयै तुस बी आई जाओ
दो-चार रुट्टियां तुस बी खाई जाओ।
भोला जमाना ते हिरख हा बथ्हेरा
कुऱन अपना ते कुऱन दप्यारा
सारे चाची-चाचे ते बुआ
रिश्ता होर कोई सेही निं हा दूआ
अंकल-आंटियां ते बाद च आए
पैह्लें सारे होंदे हे ताइयां ते ताए।
गीह्टे-स्टापु खेढ हे साढ़े
खेढदे-खेढदे रटदे हे प्हाड़ो
बब्बरू हा बर्गर ते घ्यूर हा पिज्जा
कढ़ाई चढ़दी ही जेल्लेै औंदा हा जीजा।
मक्कां भुन्ननियां, पकौड़े तलने
कन्नै गुड़ै आह्ले चौल बी बनने
मुंगफलियां खानियां, चूपने गन्ने
खमीरे बी तलोने कन्नै-कन्नै।
थोह्ड़ी कमाई च बी बरकत ही होंदी
चैने दी नींदर दुनिया ही सौंदी
अज्ज जिन्ना कमांदी, उन्ना रोंदी
दुनिया आखदी पूरी नि पौंदी
डिपरैशन, टैन्शन ने खाद्धी जान
अंदरा खाल्ली ते सुक्की शान।
चीजां घट्ट ते हिरख मता हा
साढ़ा बचपन बड़ा खरा हा
साढ़ा बचपन बड़ा खरा हा ।
