साढ़ी डोगरी ऐ सभनें दी जान, साथियो
दूरै-दूरै तगर इसदी पन्छान, साथियो ।
मारन गड़ाके, कन्नै लान-गप्प-छप्प, जी
बाईं चा घड़ोलु भरन करी छप-छप, जी
दमैं रली-मिली भाबी ते ननान, साथियो
साढ़ी डोगरी ऐ सभनें दी जान, साथियो ।
गुट्ट सूहियां होंदियां उस बेल्लै खाखां, जी
लांदे जेल्लै डोगरे सुरीलियां भाखां, जी
साढ़ी भाशा मिट्ठी बौंसरी दी तान, साथियो
साढ़ी डोगरी ऐ सभनें दी जान, साथियो ।
भाशा दी गै सेवा करो, झक्केओ निं मासा बी
गल्ल जे गलाऽ कोई, मकेओ निं मासा बी
उच्ची रक्खो तुस डोगरें दी शान, साथियो
साढ़ी डोगरी ऐ सभनें दी जान, साथियो ।
माऊ साहीं मान रक्खो, मड़ो तुस भाशा दा
चन्न बी करै तुसेंगी धन्न-धन्न गासा दा
तारे टार्चां जगाइयै टिमटमान, साथियो
साढ़ी डोगरी ऐ सभनें दी जान, साथियो ।
तित्तली बी खुशी कन्नै पा मोई कीकली
धुप्प सनैह्री, मड़ो, डोगरी दी निकली
भौरे खुश होइयै रुण-झुण लान, साथियो
साढ़ी डोगरी ऐ सभनें दी जान, साथियो ।
कोई ते सुहाग गा, कोई गा घोड़ियां
राजी रौह्न माई तेरे बच्चें दियां जोड़ियां
जोगी प्हाड़ें आह्ले सान गी बजान, साथियो
साढ़ी डोगरी ऐ सभनें दी जान, साथियो ।
बड्डी-बडेरी भामें समझो इस्सी मां तुस
दादी-पड़दादी भामें समझो ठंडी छां तुस
समझो इस्सी भामें धी ते धेआन, साथियो
साढ़ी डोगरी ऐ सभनें दी जान, साथियो ।
चाएं-चाएं सब्भै भैनां बोलदियां डोगरी
सूरजू, गदावरी, सलेखनू ते ठौकरी
निक्के गि’ल्लुएं गी डोगरी सखान, साथियो
साढ़ी डोगरी ऐ सभनें दी जान, साथियो ।
टैह्ल-सेवा करो तुस डोगरी दी रज्जियै
बुज्झगे संदोख फ्ही विदेशी भाशा तज्जियै
झंडा डोगरी दा झुलदा शमान, साथियो
साढ़ी डोगरी ऐ सभनें दी जान, साथियो ।
डोगरी दे गासै पर होआ कोरा निंबल, जी
पतझड़ मुक्की, आखन हस्सी-हस्सी सिंबल, जी
करै खिड़ी-खिड़ी चाननी गमान, साथियो
साढ़ी डोगरी ऐ सभनें दी जान, साथियो ।
शानै कन्नै सिर चुक्की चलदे न डोगरे
बैरियें गी पैरें हेठ मलदे न डोगरे
भाशा अपनी गै गंगा दा स्नान, साथियो
साढ़ी डोगरी ऐ सभनें दी जान, साथियो
दूरै-दूरै तगर इसदी पन्छान, साथियो ।
