सादे--
अस सिद्धे-सादे खुआई लैन्नें
हर बाद्धे रूहैं बसाई लैन्नें।
साढ़ी मुंढा थमां गै एह् तसीर
अस डूंह्गे जख्म भराई लैन्नें
हर बाद्धे रूहैं बसाई लैन्नें
अस सिद्धे-सादे खुआई लैन्नें।
नेईं आखने अस माड़ी गल्ल
हर मुश्कल दा फ्ही कड्ढने हल्ल
मिलियै दुख-सुख पाई लैन्नें
हर बाद्धे रूहैं बसाई लैन्नें।
सुद्धा सुआद लाई-लाइयै
रुक्खी-सुक्की पाई-खाइयै
फ्ही खुशियां मनै कन्नै लाई लैन्नें
अस सिद्धे-सादे खुआई लैन्नें
हर बाद्धे रूहैं बसाई लैन्नें।
अपने हक्क छुड़ी-छुड़ियै
गिले नेईं करचै मुड़ी-मुड़ियै
धमकियां बी सीनै लाई लैन्नें
हर बाद्धे रूहैं बसाई लैन्नें
अस सिद्धे-सादे खुआई लैन्नें।
साढ़े ब’रके कोरे रेही जंदे
एह् भुञां सदा मलोई जंदे
फ्ही बी हौंसले गुआई लैन्नें
हर बाद्धे रूहैं बसाई लैन्नें
अस सिद्धे-सादे खुआई लैन्नें।
चल ‘कुंडरिया’ पौंगरां पाई लैचै
हर दिलै च हिरख बसाई लैचै
एह् फसलां खूब उगाई लैचै
हर बाद्धे रूहैं बसाई लैचै
अस सिद्धे-सादे खुआई लैचै
हर बाद्धे रूहैं बसाई लैचै
अस सिद्धे-सादे खुआई लैचै।
