नां सिफ्तें दा ख्याल करां अ’ऊं, नां गै निंदो-निंदी आ
इक जनेहा सोआद बझोंदा मी ते कोरी थिंधी दा।
कदें बनाई नेईं आत्मा भुल्लियै चटकोरी में
कु’न केह् आखग सोच निं कीती, गल्ल गलाई कोरी में
डर नेईं लग्गा कदें कुसै दी मी ते नापसिंदी दा
इक जनेहा सोआद बझोंदा मी ते कोरी थिंधी दा।
सिफ्त सुनियै खुशी मनाई, नां भंडी पर कुढ़ेआ में
राह् कुसै दी रोकी, नां गै अपना रास्ता छुड़ेआ में
मेरे पर कोई असर निं होआ, नां उं’दी नां इं’दी दा
इक जनेहा सोआद बझोंदा मी ते कोरी थिंधी दा।
लोड़ पवै तां सिफ्तां वरना, भंडी करदे लभदे लोक
दौनीं किस्में दे मीं रत्ती ‘केसर’ नियों फबदे लोक
बेथ’वियां ते गल्लां बड़ियां, होंदा मुल्ल चुनिंदी दा
इक जनेहा सोआद बझोंदा मी ते कोरी थिंधी दा।
तल्ख तजर्बे बड़े जरूरी सिद्धै रस्तै पाने गी
सब निं होंदे हर कुसै गी गाइयै यरो सनाने गी
दौर होंदा ऐ सदा बरेसा, डी जां परसिद्धी दा
इक जनेहा सोआद बझोंदा मी ते कोरी थिंधी दा।
