मेरी हट्टी
मौली दे केईं गोले नास कीते
इक चूही ने
इक सूई दी चूही ने।
पीपा परें कीता
तां
मुंगफली दे सिक्कडे़
कुतरे दे लफाफे
ते
सूहे-सूहे धागें च लपटोए दे
लौह्के-लौह्के चूहे।
रोह चढ़ेआ
मन कीता इ’नेंगी
गत्ते उप्पर चाढ़ियै
दूर शिड़का पार छोड़ी आमां
पर
दुए गै पल ख्याल आया
ओह् जेह्ड़ी इं’दी मां
गेदी ऐ
नक्कै च बालू पाइयै मुट्टा
प्योकियें दा
प्योकियें गी गै बरधान मोड़ै तक्कर
आई
ते एह् लौह्के-लौह्के गिल्लु नेईं लब्भे
तां
उ’दा कालजा केह् आखग--
एह् सोच करियै गै
में अपनी सोच परती लेई
ते
मुड़ियै पीपा अग्गें करी ओडे़आ ।
