काले बद्दल दौड़न जिसलै, न्हेरा लगदा पौन
प्यौकै कट्टन जंदी दिक्खो, नमीं सुहागन सौन
पाई भाजियां कैंत्त बचैरा जंदा आपूं कन्नै
घर आइयै तक्कां पांदा चढ़ियै उप्पर म्हन्नै
उप्पर अंबर घोगड़ गरजन, गुच्छियां निकली औन
प्यौकै कट्टन जंदी दिक्खो, नमीं सुहागन सौन
काले बद्दल दौड़न जिसलै, न्हेरा लगदा पौन ।
मली-मलियै आटा जेल्लै जंदरी बिच्च टकान
चढ़दा म्हीना सौन खुआंदा, सीआं लड़ी लमकान
मां आखै— धुप्पा रक्खी सीआं हुन सकाओ
ञ्याणें आखन—भुक्ख लग्गी दी, दादी रज्ज लोआओ
आलू बुखारे, लीची, सेव किरी-किरियै पौन
प्यौकै कट्टन जंदी दिक्खो, नमीं सुहागन सौन
काले बद्दल दौड़न जिसलै, न्हेरा लगदा पौन ।
कचूच सैल्लियां धारां लब्भन, पानी बिच्च मकाड़े
इक दुए गी साद्दे देइयै हिरखी लांदे न ल्हाड़े
जठानी संभालै चु’ल्ल-पचौह्ला, दरानी प्यौकै जा
मियां मिट्ठु सुच्च दबाइयै कन्नैं फोन ला
अक्खीं अत्थरूं जिसलै हिरखी निच्चड़ी-निच्चड़ी पौन
प्यौकै कट्टन जंदी दिक्खो, नमीं सुहागन सौन
काले बद्दल दौड़न जिसलै, न्हेरा लगदा पौन ।
मक्क जेल्लै आवै जोआनी, मुच्छ लगै लमकान
टींडे, कद्दू, बड्डी घंडोली लड़ियां जफ्फी पान
रौंगी, तोरी बेलां कन्नै खिट्टें पेदियां दौड़न
दोऐ भैनां गलै मिलियै सिरै दियां गुत्तां जोड़न
कंदूरी बेलां चढ़ी पलेसैं टाह्लैं जाई पलचोन
प्यौकै कट्टन जंदी दिक्खो, नमीं सुहागन सौन
काले बद्दल दौड़न जिसलै, न्हेरा लगदा पौन ।
उप्पर खजूरैं घुंगे पक्कन, मर्हैल, किश दराड़
साढ़ी बीबी म्हेशा एह् ऐ, मिट्ठा खंड सोआद
तंदूरी खमीरे अपनी जगह सुद्धा सोआद बनान
नारदाना ते तिंबरू, पूतना चटनी कन्नै खलान
अंबल मिट्ठा जदूं बी बनै तंदूरी खमीरे थ्होन
प्यौकै कट्टन जंदी दिक्खो, नमीं सुहागन सौन
काले बद्दल दौड़न जिसलै, न्हेरा लगदा पौन ।
देसी निंबू चढ़ै जोआनी तुप्पै अपना थाह्र
सुहे गुट्ट टमाटर बलगन एह् बी पूरे तेआर
गंढा आखै—अ’ऊं की मैंह्गा, माढ़ा रेट घटाओ
आलू, करेले छंदे करा दे—साढ़ी इज्जत बचाओ
अंब आपूं किरी-किरियै भुञां जेल्लै पौन
प्यौकै कट्टन जंदी दिक्खो, नमीं सुहागन सौन
काले बद्दल दौड़न जिसलै, न्हेरा लगदा पौन ।
ट्येऊ ते अंब, दोऐ रलियै मेथरे बिच्च पोआन
सौंफ, जवैन तेल बी कन्नै मता सोआद बनान
मर्च बी आखै— माढ़े बिजन कि’यां पांदे ओ चार
मंभ बचैरा छंदे करा दा मिगी बी देओ थाह्र
घुली-घुलियै लून बचैरा लगदा जिसलै चौन
प्यौकै कट्टन जंदी दिक्खो, नमीं सुहागन सौन
काले बद्दल दौड़न जिसलै, न्हेरा लगदा पौन ।
निक्कियां-निक्कियां पौन फुहारां ञ्याणें घर डकोन
एह् नशानी सौनै दी ऐ, तोपें बूंदा चौन
सौन म्हीना खूब बरखा ब’रदी, मोर बी पाह्लां पांदे
रंगें भरी-भरोची एह्ब्बी पींह्गैं झूटे लैंदे
कुरजै पानी सीरैं जेल्लै नाड़ुएं हेठ न्हौन
प्यौकै कट्टन जंदी दिक्खो, नमीं सुहागन सौन
काले बद्दल दौड़न जिसलै, न्हेरा लगदा पौन ।
‘कादिर कुंडरिया’ सौन नभाऽ दा कल्ल-मकल्ला जाड़ैं
इं’दे हौसलें मिगी बचाया, बचेआ रुढ़दा हाड़ैं
किश सिरै पर ढींबे उड्डन, रंगी फंघ डुआरी
कन्नै इं’दै खेढदे टप्पी इक-इक माढ़ी धेआड़ी
चढ़ियां पींह्गां सारे पास्सैं , दिक्खी लगां बसोन
प्यौकै कट्टन जंदी दिक्खो, नमीं सुहागन सौन
काले बद्दल दौड़न जिसलै, न्हेरा लगदा पौन ।
