हाशिया

जे इस हाशिया लोआंघेआ ऐ
 तां 
किश गल्ल ते जरूर होनी 
होई सकदा ऐ जे 
बरके दी जमीन गै
निं त्यार होऐ
खलारियै भावें गी राह्‌‌‌ने गित्तै
मनै दे दांदें गी बिन जोत्रें दे जुगड़ने गित्तै
जां केह् पता जमीनै दा फलाऽ गै होऐ सौंगड़ा 
की जे बिजन कुसै ठोस ब’जा दे मुमकन नेईं लंघना मित्ती पर खिच्ची दी कच्ची काह्‌‌‌र बी 
एह् ते हाशिया ऐ पक्की स्याही दा प्रतीक 
फ्ही एह् खुंझ कि’यां होई सकदी ऐ
मेरी कान्नी बशक्क अड़ियल ऐ पर मरेआदा हीन नेईं।
—————————————————————-