तूं हुन मिलेआ खीरी मौकै
छौरे ढलदे स’ञ घरोंदै
तूं दिक्खी नेईं ओह् धुप्प किड़कनी
ना धुप्पा दा सेक तूं जरेआ
जिसदी तप्पश झलोंदी निं ही
शिकल दपैह्र जदूं ही मेरै
ते हुन
हुन ना गै ते ह्ह धुप्प किड़कनी
ना पैह्ले जेही तप्पश ओह्कड़ी
सेक दना निं बाकी रेह् दा
हुन मैं आं इक्क स’ञ घरोंदी
तूं हुन मिलेआ खीरी मौकै
ओह् फुल्ल खिड़े दे तूं निं दिक्खे
जिसदी मैह्क-सुगंधी हरदम
अतर घोलदी फिरदी सारै
मस्त-बांवरी पवन पुरे दी
खुश्बोइयें नै लद्दी रौंह्दी
तूं निं दिक्खेआ हरा-भरा ओह् बाग-बगीचा
तूं दिक्खी निं सज्ज-सजावट नोखी उसदी
बांदी ब्हार जदूं ही मेरै
ते हुन
हुन निं ओह्का मौसम रेह् दा
हुन निं रौनक उस बगीचै
ना ओह् सज्ज-सजावट उसदी
ना गै ब्हार रौंगली कुधरै
हुन में इक्क वीरान बगीचा
तूं हुन मिलेआ खीरी मौकै ।
