गज़ल

तढ़दे  शूल  खंझाना सिक्खो
अल्ले ज़ख्म भलाना सिक्खो। 

निमतां  जेकर  गोदै    तुं’दी
ऐह्‌में  नेईं  चघाना    सिक्खो। 

ढौंदा  जेकर  साथी  अपना
देइयै  हत्थ ठुआना सिक्खो। 

नदियैं -नालैं  ख़ल्वत  रिसदी
सागर जाई समाना  सिक्खो। 

उड्डियै नेईं, तां बेशक्क टुरियै
गासै गी तुस गाह्‌ना  सिक्खो। 

प्रीत  भलेखैं  पलदी  रौंह्‌दी
अपना आप गोआना सिक्खो। 

आई  बेह्‌ड़ै  जो  थु’म्मी  दिंदे
चेते-काग डोआना सिक्खो। 

कैह्‌सी  घोट चढ़े  दा  रौंह्‌दा
दिल दी गल्ल गलाना सिक्खो।