आ’ऊं कंडेआरी जाड़ै अंदर, कोल निं मेरै बौंह्दा कोई
राही लंघन सफरैं पेदे, कश निं मेरै औंदा कोई।
डाह्ल्ली पर निं चैह्कै-मैह्कै, डार एह् रंगली चिड़ियें दा
पूर निं मेरे कोल ऐ ढुकदा, कीकली पांदी कुड़ियें दा
में अपने सुखनें दे बिच्च बी गीत निं सुनेआ गोंदा कोई
आ’ऊं कंडेआरी जाड़ै अंदर, कोल निं मेरै बौंह्दा कोई ।
प्रीतां-वेदन नांऽ दा अड़ेओ, तत्त मी समझा आया निं
मेरी खुंझें-भुल्लें उप्पर कुसै बी मी समझाया नेईं
देआं दलासा की कर कुसै गी, रोंदा र’वै जो रोंदा कोई
आ’ऊं कंडेआरी जाड़ै अंदर, कोल निं मेरै बौंह्दा कोई ।
जाड़े दे बिच्च कल्ल-मकुल्ली, नेईं जांता में भाईचारा
तां मेरा संवेदन मरेआ, अंदर भरेआ र’वै तरारा
धूं-धूं मकदे भांबड़ थल्लै, कुसै निं दिक्खेआ सौंदा कोई
आ’ऊं कंडेआरी जाड़ै अंदर, कोल निं मेरै बौंह्दा कोई ।
पाइयै कूने मेरे कन्नै, दूर र’वै जे रौंह्दा कोई
पांदे रौह्न जो छिन्ने पांदे मेरी घंडी र’वै तनोई
मी नेईं कदें बी लिफना आया, लक्ख र’वै मी कोंह्दा कोई
आ’ऊं कंडेआरी जाड़ै अंदर, कोल निं मेरै बौंह्दा कोई ।
झल्ल चरस्ते बिच्च खडेरां, बत्तै कंडे राहे में
ऐह्सास मरे मेरे, निं रक्खे जख्में उप्पर फाहे में
जद बी अंदर सूल तिड़कदे, थाह्र निं इक खड़ोंदा कोई
आ’ऊं कंडेआरी जाड़ै अंदर, कोल निं मेरै बौंह्दा कोई ।
भिनक पवै मेरे कन्नें इच, कोई मारै आले ओ
की नेईं धरती दी छाती चा पीते हिरख प्याले ओ?
प्रीत सरें चा अमरत कड्ढै, टामां गै बस्स होंदा कोई
में कंडेआरी जाड़ै अंदर, कोल निं मेरै बौंह्दा कोई ।
पैंछी चुरमुर करदे, गांदी कोयल गीत मल्हारें दा
हरेआली बिच्च फुल्ल सोभदे, देन संदेसा ब्हारें दा
हरी-भरी एह् रचना छोड़ी, नेईं कंडैं पलचोंदा कोई
में कंडेआरी जाड़ै अंदर, कोल निं मेरै बौंह्दा कोई ।
इक नमाना कवि एह् आखै, सील-सुआतम रक्खै जो
पक्क जानेओ, जग परोआरी अमर प्रीत रस चक्खै ओह्
तां स’ञां दी बेल्ला दे बिच्च बनियै नूर घरोंदा कोई
में कंडेआरी जाड़ै अंदर, कोल निं मेरै बौंह्दा कोई
राही लंघन सफरैं पेदे, कश निं मेरै औंदा कोई।.
