नेईं धरती, नेईं अंबर झलदा, अ'ऊं त्रुट्टे दा तारा आं
मेरे भागें ठोकरां लिखियां, अ'ऊं कर्में दा मारा आं ।
लीक-बलीका होई गे ब’रके मनै दी इस कताबै दे
उलझी गे न आपूं बिच्चें, रेह् नेईं कुसै बी स्हाबै दे
घटी गेआ जो घटदे-घटदे, पींह्गै दा इक लोआरा आं
मेरे भागें ठोकरां लिखियां, अ'ऊं कर्में दा मारा आं ।
दुख जाने दा नांऽ नेईं लैंदे, खुशियां कोल नेईं ढुकदियां
अनमिथियां न सोचां मनै च, एह् मकाऐ नेईं मुकदियां
कु'न मेरे नै सांझियां करदा, हर कुसै गी कसारा आं
मेरे भागें ठोकरां लिखियां, अ'ऊं कर्में दा मारा आं ।
अ'ऊं बेगौरा गौर नेईं कोई, कक्खें लेखा रुली गेआ
बिधना दे लेखें दा जोखा, अत्थरुएं नै धुली गेआ
आस नेईं कोई नजरी औंदी, हर पास्सेआ गै हारा आं।
मेरे भागें ठोकरां लिखियां, अ'ऊं कर्में दा मारा आं
नेईं धरती नेईं अंबर झलदा, अ'ऊं त्रुट्टे दा तारा आं ।
……
