मेरे मनै गी
सुच्चे भावें दे रंग ते खशबो च जक्कियै
बख्शी नाड़ुएं दी चंचलता
मेरी चाल गी झरनें दी रवानी देइयै
साहें गी सरगम दा ताल सखाइयै
कुदरत ने रचेआ मिगी
स्रिश्टी दे कैनवस उप्पर
इक शैल थल-द्रिश्श
इक मनुक्ख
अपना शाहकार ।
पर
मेरे मनै दी सैह्जता गी
पर्देदारी दियें मेखें कन्नै कीह्लियै
मेरे साहें गी ऊंच-नीच दियें रस्सियें नै जुट्टियै
रंगले भावें पर
दुनियादारी दा रंग पोच्चियै
मेरा मन प्रदूशत करियै
बनाई दित्ता गेआ मिगी
इक बदरंग कुप्पड़
बेनुहारा इक सप्पड़
जिस उप्पर उग्गी आइयां
बेबसाही, छल-फरेबें दे
ते होर केइयें डरें-त्राहें दियां
कंडेआलियां थोह्रां त्रप्पड़ ।
फ्ही सोच फुरी
जे
एह् किल्ल-मेखां
एह् रंग-रोगन
एह् जुट्ट-रस्से
सब बाह्री न
इ'नेंगी पुट्टेआ
धोता
त्रोड़ेआ-फूकेआ जाई सकदा ऐ।
इस सोच दा तलिस्म तारी होंदे गै
खिड़न लगी पेइयां थोह्रां बी
हुन परतोआ करनी आं पल-पल
अपने मूल रूपा च
जि'यां बसैंत परतोने पर
प्रकृति परतियै होई उठदी ऐ
नमीं-नरोई
खूबसूरत
मनभांदी
जीवनदाती
शाह्कार ।
