चेतै औंदियां न अपने म्हल्ले दियां
ओह् नामीं ग’लियां
जेह्ड़ियां कद्दाबर बूह्टें करी
पन्छानियां जंदियां हियां--
अंब आह्ली ते बोह्ड़ आह्ली ग’ली।
केईं अपना थकेमा
इं’दी छामां तोआरदे।
ब्हारी अंबें ते गुऱल्लें दा नंद लैंदे
बड़ियां रज्जी-पुज्जी दियां हियां ओह् ग’लियां ।
बूह्टें दे उच्चे डाह्ल्लें पर
रस्सी दियां पींह्गां
उं’दे झूटे, उच्चे लुआरे
चबक्खै लग्गे दा मेला
कुडियें- जागतें दा
पेदा कैंको- रौला
स्कीमां बनदियां
लड़ाई-झगड़े
फ्ही बी सांझ
अपनी-अपनी दुनिया च सब मस्त
बड़ी मस्त ही उ’नें ग’लियें दी दुनिया ।
ग’लियां अज्ज बी हैन
हुन उत्थै
खड़मल्ली, खौधल, बेचैनी,
चलो-चली ऐ
बूह्टे मनसूबें करी
कतल होई गे
नांs कुतै गोआची गे
ग’लियें दी पन्छान
हुन दकानां-हट्टियां न
सब ओपरा-ओपरा ऐ ।
मिगी चेतै औंदियां न
ओह् ग’लियां
कीs औंदियां न
पता निं
पर, औंदियां न चेतै
ओह् चेते होई गेदियां ग’लियां ।
…
