उसदा बाबा लेइयै छाब्बा
लांदा हा फेरी ग’ली-ग’ली
खीलां, पतासे, मुरमुरा लेई लैओ
कन्नै लेई लैओ मुंगफली
लांदा हा फेरी ग’ली-ग’ली ।
भुक्ख, गरीबी ते बदनसीबी
कोई निं भामें हा उसदा करीबी
ईन, इमान दा पक्का हा ओह्
अडदा नेईं हा ओह् कदें बी तली
लांदा हा फेरी ग’ली-ग’ली ।
भखदी धुप्पा छाब्बा चुक्की
साह्-सत भलेआं हा गेदा मुक्की
पिंडा ओह्दा जली जंदा हा
पौंदे हे छाले चली-चली
लांदा हा फेरी ग’ली-ग’ली ।
चमड़ी उसदी गेदी ही उक्कड़ी
जिंद होई ही सुक्कियै लुक्कड़ी
उसदा जागत भुक्कड़ी-भुक्कड़ी
खंदा हा उसगी तली-तली
लांदा हा फेरी ग’ली-ग’ली ।
जीना उसगी लगदा हा झंजट
स’ञां ‘लै लेई औंदा हा भनकट
पालना कि’यां इन्ना टब्बर
रोंदा हा अक्खीं मली-मली
लांदा हा फेरी ग’ली-ग’ली ।
ब्हारां उसने निं दिक्खियां उक्कियां
बस्स दिक्खियां तां धेलु-दुक्कियां
जींदे-जी सब हीखियां मुक्कियां
मार ही भागें दित्ती भली
लांदा हा फेरी ग’ली-ग’ली ।
एह् जीवन बस्स मुंगफली ऐ
तत्ते कुन्नुऐ नै जली-जली
सोह्ल कलेजा फकोई जंदा
दुक्खें ते जालें नै जली-जली
लांदा हा फेरी ग’ली-ग’ली ।
कुढ़दे रौह्ना, चुड़दे रौह्ना
दांदै आंह्गर बुढ़दे रौह्ना
जिसगी जीवन रास निं औंदा
मोमै आंह्गर ओह् जंदा घली
लांदा हा फेरी ग’ली-ग’ली ।
