शब्द इक-इक सरमत्थ ऐ
पर शब्दें च ऐ फर्क बड़ा
किश शब्द बस्स करी लैंदे
किश शब्दें च ऐ तर्क बड़ा ।
खौह्रे मन जेकर बोल्लै कोई
सीन्ना छल्लनी न करी दिंदे
पीड़ां किश शब्द हरदे न
डूंह्गे जख्म बी भरी दिंदे ।
किश शब्द त्रट्टियै सु’टदे
किश न शमान चढ़ाई दिंदे
इक शब्द सतगुरु जी देइयै
परमेसर कन्नै मलाई दिंदे ।
भुल्ली जंदे फट्ट डूंह्गे
पर शब्द कौड़े भुलदे नेईं
ढिड्डै च प्लेस नेह् बनदे
फ्ही खोह्ल्ले दे बी खु’लदे नेईं ।
जीह्बै पर आए खोई जंदे
एह् बस्स दनां बी रौंह्दे नेईं
होंदा नेईं कदें महाभारथ
द्रोपता शा जेकर खोंदे नेईं।
काह्न्नी दी चुंझ शा निकलेआ
हर शब्द ‘रतन’ भांदा ऐ
शब्दें शा मोती मिलदे न
जदूं गाइयै कोई सनांदा ऐ ।
