नेईं खूसो मेरे हत्थें शा साज मेरा
मी गान देओ
नेईं देओ मेरे हत्थैं बंदूख जां हल
मी गान देओ
अजें नेईं लग्गे सुर पूरे
हल्ली मेरे गीत अधूरे
नेईं खूसो मेरे हत्थें शा साज मेरा
मी गान देओ
नेईं देओ मेरे हत्थैं बंदूख जां हल
मी गान देओ ।
जुल्म, फरेब अजें हावी ऐ
साढ़ी जंग अजें जारी ऐ
मी सेही ऐ--
भुक्खे-भाने ढिड्डै बिच्च
गीत नेईं
क्रांति पलदी ऐ, मी सेही ऐ
लोड़ तुसें नेईं गीते दी
नेईं सेही
पर मी सेही ऐ--
जेल्लै मुक्कग भुक्ख थुआढ़ी
राज-सिंहासन पर तुस बौह्गे
त्रै-लोकें दे सर्वर होगे
तां बी एह् भटकन नेईं मुक्कग
तां बी तुं’दी रूह् तुप्पग
उस इक गीतै गी
जो में तुप्पां
नेईं खूसो
नेईं खूसो मेरे हत्थें चा साज मेरा
मिगी गान देओ
नेईं देओ मेरे हत्थैं बंदूख जां हल
मी गान देओ
नेईं खूसो, नेईं खूसो
मी गान देओ ।
