बदलोंदा दौर---
नेहा बदलोंदा दौर आया
जीने दा तरीका बदलोई गेआ
नमें-पुराने सरबंध अपनी थाह्रें टकाइय़ै
उ’नेंगी समझने दा नजरिया बदलोई गेआ।
जढ़ें कन्नै परतियै जुड़ाई गेआ
उ’नेंगी नभाना समझाई गेआ
डुआरियां भरने दे पर कुतरियै
जिमीं कन्नै जुड़े रौह्ने दी लोड़ दस्सी गेआ।
नौसिखुएं गी मता किश सखाई गेआ
सिक्खे-सखाएं गी मता किश भुलाई गेआ
जे किश चेता रक्खना बी चाहेआ
उं’दा संदर्भ गै बदलोई गेआ।
ब्रह्मांड दी गरजदी ललकार सुनाई गेआ
ताहीं-तुआहीं भटकने थवां बचाई गेआ
बदलाव कुदरत दा टकोह्दा चलन ऐ
इस सच्चाई दा सामना खरी चाल्ली कराई गेआ।
मते पैर पसारने दी चाह् बधाई गेआ
पर मतियां लोड़ां ते घटाई गेआ
समाजै च ते सब गै बने दे रेह्
पर मेल-मलाप दा ढंग बदलोई गेआ। .
