उच्चे-लम्मे
अंबर छूंह्दे
तूं दिक्खै न मौन शिखर जो
वेदन इं’दी कुसने बुज्झी
कुसने दर्द फरोले इं’दे
ख़ामोश खडोते लब्भन भामें एह दूरा दा।
ब,अंदर इं’दे लोर मकै दे
लूं-लूं अग्ग बलै दी म्हेशा
ते, दूर कुतै डूंहगे अत्त डूंहगे
सुरवल सुरवल गड़कै करदे अनसंभ लावे
जो सुरकै दे
जो खुरचै दे कैंतर कैंतर धरत तलें रोज़-बरोज़ी।
इस्सै चाल्ली हर माह्नू इक्क मौन शिखर ऐ
जिसदे अंदर शोर मचे दा ते पेदा करलद्द बथ्हेरा
कैंको-रौला
जिसदी भिनक बशक्क निं पौंदी।
इसदे अंदर
दूर कुतै डूंहगे, अत्त डूंहगे गड़कै करदे
दुक्ख-कसालें
सैंसा-झूरें
दर्द-गमें दे सुरवल-सुरवल अनसंभ लावे
जो सुरकै दे, जो ख़रचै दे रोज़-बरोज़ी धरत तलें दी।
चंगा ऐ ख़ामोश गै रौह्ना इं’दा इत्थै
तां जे कुधरै नर्थ निं होई जाs
ना कोई क़ैह्र त्रुट्टै इत्थै
एह् चंगे ख़ामोश खड़ोते
तूं दिक्खै न मौन शिखर जो
उच्चे-लम्मे
अंबर छूंह्दे ।
