केह् दस्सां किस चाल्ली दा ऐ भाव जगाऽ दी
जंगलै दे बिच्चो बिच्चो सड़क ऐ जो जा ‘रदी
सज्जै-खब्बै रुक्खें इस चाल्ली उस्सी घेरे दा
लगदा निं पता उत्थै स’ञ ते सवेरे दा
घेरियै दबक्खी रुक्खें छत्त ऐ बनाए दा
कु’त्थूं धोड़ी खबरै पंडाल ऐ सजाए दा
अग्गै अग्गै-अग्गै अग्गै दौड़दी गै जा दी ।
सोहै बी स्यालू स’ञ लगदी घरोई दी
नेही ऐ नुहार उसी उस थाह्र थ्होई दी
प्हाड़ें च दपासै नाड़ू छर-छर चलै दे
इक्के-दुक्के माह्नू प्हाड़ चढ़ै दे, ढलै दे
मारियै कलावे जि’यां प्हाड़ गलै ला दी ।
रुक्खें-बूह्टें बिच किन्नी फब्बी-फब्बी पवै दी
गुफा च समांदी जन सड़क बझोऐ दी
चफेरै गास छूंह्दे जन उच्चे-उच्चे प्हाड़ न
गूढ़े सैल्ले -रौंसले जंगल ते जाड़ न
कुदरत बझोऐ जि’यां मंगल मनाऽ दी ।
लब्भै दे न रुक्ख साफ-सुथरे खड़ोते दे
रोज त्रेलु कन्नै न्हाते दे ते धोते दे
उत्थै परदूशन दा निं उठदा सुआल ऐ
रुक्खें-बूह्टें हर प्हाड़ उत्थै मालामाल ऐ
रुक्खें दियें भुंबलियें धुप्प ऐ चमकाऽ दी ।
पक्खरू-जनौर रौंह्दे, घट्ट गै मनुक्ख न
जित्थु धोड़ी नजरी दी पौंह्च, छड़े रुक्ख न
बेलें -बूह्टें कन्नै पलचोए दा जाड़ ऐ
बिंद बी निं खाल्ली कोई लभदा थाह्र ऐ
इक्कली गै सड़क उत्थै रस्ता बनाऽ दी ।
कुदरत दा दक्ख नेईं शब्द समझाई सकन
शब्दें दे भाव गी नेईं दक्ख दर्शाई सकन
भाव-सागरै दे बिचा शब्द एह् औंदे न
शब्द जाई हिरदै फ्ही भावें च समांदे न
थाह् कुसै भाव दी नेईं बुद्धि लेई पा दी ।
दिक्खियै खुशी गी में मसूस छड़ा करै नां
कुदरत दे शलैपे गी में हिरदे च भरै नां
कदें नेईं खड़ोंदे किट्ठे शब्द ते दक्ख
कि’यां फ्ही बलोऐ जि’यां-जि’यां दिक्खै अक्ख
रेही-रेही भावना ऐ मेरी तड़फाऽ दी
जंगलै दे बिच्चो बिच्चो सड़क ऐ जो जा ‘रदी ।
