नाड़ी छूहियै दस्स हां, क्हीमा
केह् संताप सनोचा अंदर
भस्म-भबूती करी टकायां
जो बी पाप भरोचा अंदर
नाड़ी छूहियै दस्स हां, क्हीमा।
तूं सभनें दी मर्ज पछानैं
मन्नां, मेरी गर्ज पछानैं
किस खुंझा दे बदलै होआ
खुट्टा, सुच्च-मसुच्चा अंदर
नाड़ी छूहियै दस्स हां, क्हीमा
केह् संताप सनोचा अंदर?
सैंसें दी भरमाली ,क्हीमा
कड्ढ हां पुड़ी नराली, क्हीमा
चानन जे कुधरै आई ठैह्कै
होई जाऽ धुला-धनोचा अंदर
नाड़ी छूहियै दस्स हां, क्हीमा
केह् संताप सनोचा अंदर ?
मनै जे मैली सोच पलै जे
कुसै गी मेरी नीत छलै जे
करेआं ऐसी जुगत जे बाह्रें
ब’रै जो घना-घनोता अंदर
नाड़ी छूहियै दस्स हां, क्हीमा
केह् संताप सनोचा अंदर ?
जे अंदरोठी पूरी लब्भै
चित्तै धूड़-मधूड़ी लब्भै
रिश्में दा तूं करेआं छुंबा
लट-लट लायां पोचा अंदर
नाड़ी छूहियै दस्स हां, क्हीमा
केह् संताप सनोचा अंदर
भस्म-भबूती करी टकायां
जो बी पाप भरोचा अंदर ।
