मिगी मनै इच नैनें राहें ओह्दी छवि तुआरन दे
घोर वरानी अंदर मेरै बाली दीप संवारन दे ।
कुशबा इस विशवासै पुज्जै दिल मेरे गी चैन दनां
मिगी कुसै औने दी मेदा कोठै काग डुआरन दे ।
भाव कुंगले उग्गी पौने, सुन्न होई दी सोचें इच
हिरख-प्रेम दी क्हानी गित्तै इ’नें गी शब्द बचारन दे ।
सच्चाई दी धरती कन्नै इक सरबंध जुड़ी जाना
बैह्म गास चा मन दा पैंछी थोह्ड़ा ख'ल्ल तुआरन दे ।
नमे रवाजैं, नमियें सोचैं गिज्झी जाऽ किरदार मेरा
अपने शैह्रै इच मी, अड़ेआ, किश दिन होर गुजारन दे ।
बड़ोई-मठोइयै उलझी जाङन जीवन दे जंजालें इच
इत्त बरेसा, इन बच्चें गी रज्जी मौजां मारन दे ।
दुनियादारी छुड़कै करदी, ना सद्धर ना आस मनै
जीऽ बी पल-पल मरदा जा दा, जीनै लेई किश कारण दे।
सोची-समझी सारी दुनिया मनदी ऐ आदर्श तुगी
कठन परिक्खेआ देइयै तु’म्मी सभनें ई इक उदाहरण दे।
