बडलै उट्ठियै
में किश जरूरी कम्म करनां
पैह्लै ते में इक मलाटी करनां
अपने आप कन्नै
इस मलाटी च
ना कुसै चाल्ली दे लेहाज आस्तै कोई थाह्र ऐ
नां कोई पर्दे आस्तै
‘में’ ते मेरा ‘में’
इक दुए दे रूबरू होन्ने आं बेपर्दा
फ्ही में
अपने मनै दे साज दियां
ढिल्लियां पेई दियां तारां कस्सनां
तां जे दिनैं में
कोई बेसुरियां बाजां नेईं कड्ढां
ओह्दे बाद
उस बुड्ढे दे हत्थ सोटी ते दीआ थम्हाइयै
ड्योढी टपाइयै
उस्सी बरधाई औन्नां
जेह्ड़ा पक्के पैरैं
मेरे मनै दा पसार मल्ली लैना चांह्दा ऐ
फ्ही बुड्ढे कोला खाल्ली कराए दा मनै दा पसार
अपने अंदरै दे ञ्याणे गी खेढने आस्तै सौंपियै
दिना दा सफर रंभना
एह् जरूरी कम्म करनां
में बडलै उट्ठियै
सभनें शा पैह्लै ।
