मते नेईं लाड ला, साथी
मती नेईं मन्न लोकें दी
मते विश्वासें दे स्हारे
अखीरै च जैह्र गै होंदे
मते नेईं लाड ला, साथी ।
तू पीड़ें दा ते ऐं शौकी
गरजें दा बी ऐ लोभी
मती बगानियां पीड़ां
समें दे झूठ गै होंदे
मते नेईं लाड ला, साथी ।
कोह्दे लेई गीत गा ना ऐं
तुगी सुनना कुसै कु’त्थें
मती मिलने दी तांह्गा बी
दिलै दे छोल गै होंदे
मते नेईं लाड ला, साथी ।
मती डु’ल्ली दी ममता बी
कालजै ठंड नेईं पांदी
मते रोए दे अत्थरुएं
पराने मीत नेईं थ्होंदे
मते नेईं लाड ला, साथी ।
जे दुनियां च जीना ऐ
झूठै दा गै स्हारा लै
मती सुच्चियें नीतें
मनै च खोल गै रोंदे
मते नेईं लाड ला, साथी ।
