शकलां, नांऽ, थाह्र,तरीकां
गल्लां, गैह्लां
जो चेतें दे बूह्टे उप्पर
केईं साल्लें शा पले-फुल्ले न
इक-इक करियै किरन लगे न
शकलां, नांऽ, थाह्र,तरीकां
गल्लां, गैह्लां ।
होन लगां में परती उ’आं
पैदा होने पर हा जि’यां
नंगे पिंडै सूरज ब’रदा
लोऽ अच्चरा दी जढ़ें च मेरी
हुन में
अपने अंदर गै अंदर बधना ऐ
ते तुप्पना इक रस्ता
जो मुकदा ऐ जाइयै
इक शकलै पर
इक नांऽ पर
जो में बी आं
जो तूं बी ऐं
जो म्हेशा हा
ते रौह्ना ऐ
शकलां, नांऽ, शैह्र,तरीकां
गल्लां, गैह्लां
जो चेतें दे बूह्टे उप्पर
केईं साल्लें शा पले-फुल्ले न
इक-इक करियै किरन लगे न
इक-इक करियै किरन लगे न ।
