बरसांत जदूं बी मुकदी ऐ
झड़ियें दी लड़ी त्रुटदी ऐ
अदूं बक्खरा जन बझोंदा ऐ
नित्त गास त्रेलु न्हौंदा ऐ
होऐ अंबर रंग शमानी फ्ही
नेईं लब्भै थां-थां पानी फ्ही
बदलें गी बडला तज्जी जाऽ
सिर पग्ग सनैह्री बज्झी जाऽ
हर चीज फटाफट सुकदी ऐ
बरसांत जदूं बी मुकदी ऐ ।
सुस्ती अंदरै दा नसदी जाऽ
नस-नस बिच चुस्ती बसदी जाऽ
गेई दी वापस थ्होई चलै
जिंदु बिच जिंद भरोई चलै
मन खुशी दा आलम छाई चलै
जीने दा रंग चढ़ाई चलै
मनै बिच्चा आलस पुटदी ऐ
बरसांत जदूं बी मुकदी ऐ ।
बरसांत मुहार जा मोड़ियै
सैलतन चबक्खी छोड़ियै
नित्त गासै पौंदियां पींह्गां न
ते पक्खरुएं दियां रींह्गां न
दिनै गर्मी, रातीं ठंड होऐ
बडलै, स'ञैं बड़ा नंद होऐ
रफ्तार सोहे दी रुकदी ऐ
बरसांत जदूं बी मुकदी ऐ ।
जदूं कांऽ सराधू औंदे फ्ही
बच्चें गी चूग खलांदे फ्ही
जदूं अंबर गूंज भरोंदी फ्ही
कोऽ-कोऽ चबक्खी होंदी फ्ही
मिट्टी बिच जादू होऐ फ्ही
बक्खरी खश्बोऽ भरोऐ फ्ही
ब'री-ब'रियै बर्खा हुटदी ऐ
बरसांत जदूं बी मुकदी ऐ ।
नेईं गर्मी ठंड सतांदी ऐ
हुन ब्हार बझोंदी बांदी ऐ
ब्हा चलदी ठंडी-हौली ऐ
ठंड औने लगदी तौली ऐ
बसैंत ठंड जि'यां हरदी ऐ ,
बरसांत आह्नदी सर्दी ऐ
गर्मी अदूं भलेआं झुकदी ऐ,
बरसांत जदूं बी मुकदी ऐ।
गर्मी कोला जिंद छडोंदी ऐ
बक्खरी गै खुशी बझोंदी ऐ
बिंद रौंह्दा हुम्म जां बट्ट नेईं
एह् रुत्त बसैंत शा घट्ट नेईं
जदूं थां-थां होंदे जगराते
अस्सूं दे औंदे नवराते
गर्मी गी पुट्टी सु'टदी ऐ
बरसांत जदूं बी मुकदी ऐ ।
जदूं उडदे सर-सर करियै न
पक्खरू डुआरी भरियै न
बनै गास रौंगला मन-मोह्ना
ते म्हौल चबक्खी फ्ही सोह्ना
चिक्कड़-तलैह्ट नां ठोकर ऐ
नां मच्छर, मक्खी मोह्खर ऐ
गर्मी जि'यां भलेआं रुसदी ऐ
बरसांत जदूं बी मुकदी ऐ ।
र'वै चार-चफेरै सैल्ला फ्ही
निं अंबर बिंद बी मैला फ्ही
कुतै गिल्ल, सि'ल्ल नां गारा ऐ
मन-भाना म्हौल प्यारा ऐ
की नांऽ नेईं इस रुत्तै दा
नंद जिसदा हर कोई लुट्टै दा
मेरे शा रूह् मेरी पुछदी ऐ
बरसांत जदूं बी मुकदी ऐ ।
बक्खरी ऐ रौनक अज्जै दी
गम-गम मधानी बज्झै दी
मां म्हेशां कम्म च लब्भै दी
कुतै धार गवें दी कड्ढै दी
धारें दी जदूं घनघोर पवै
अदूं शैल सुहामां दौर होऐ
तारें गी चाननी तुपदी ऐ
बरसांत जदूं बी मुकदी ऐ ।
अज्ज सीतू रौला पा करदा
'ठंड आई-आई' गा करदा
मौसम बी नशा चढ़ाऽ करदा
अज्ज लभदी रुत्त दरंगी ऐ
रुत्तै हरेआली बंडी ऐ
ठंड औंदी लुकदी-लुकदी ऐ
बरसांत जदूं बी मुकदी ऐ।
…
