अमन दी बस्ती आ हां, मड़ेआ
तूं हिरखी डेरा ला हां, मड़ेआ
दिक्ख हां तूं नज़ारे एह्दे
फ्ही सौखी मंजल पा हां, मड़ेआ ।
छुड़चै सब एह् खैह्रो-खैह्री
इ’न्नै कदूं एह् इन्सानियत जोड़ी
मेल-मलापी दुनिया च बेहियै
एह् हिरखी दुनिया बसांऽ हां, मड़ेआ
दिक्ख हां तूं नजारे एह्दे
फ्ही सौखी मंजल पा हां, मड़ेआ
अमन दी बस्ती आ हां, मड़ेआ
हिरखी डेरा ला हां, मड़ेआ ।
बैरी कोई निं भुल्ली जा
तूं ओह्दे कन्नै खु’ल्ली जा
द’ऊं गैईं अग्गें जा हां,मड़ेआ
फ्ही घोटी गलै नै ला हां ,मड़ेआ
दिक्ख हां तूं नजारे एह्दे
फ्ही सौखी मंजल पा हां, मड़ेआ ।
नौजोआनी तेरी ऐ जेह्ड़ी
फ्ही निं लब्भनी बेड़ी एह्दी
हत्थें मछुआ आपूं चलाई
एह् बेड़ा पार कराऽ हां मड़ेआ
अमन दी बस्ती आ हां, मड़ेआ
तूं हिरखी डेरा ला हां, मड़ेआ
दिक्ख हां एह्दे नज़ारे मड़ेआ
फ्ही सौखी मंजल पा हां, मड़ेआ ।
शोर-शराबा कदें निं सोब्भै
हमेशा एह् डोब्बै गै डोब्बै
लाइयै बैठकां हिरखी, मड़ेआ
इक बारी पुन्न कमाऽ हां मड़ेआ
दिक्ख हां एह्दे नज़ारे मड़ेआ
फ्ही सौखी मंजल पा हां, मड़ेआ
अमन दी बस्ती आ हां, मड़ेआ
तूं हिरखी डेरा ला हां, मड़ेआ ।
जालसाज़ी दो-नंबर कमाई
छुड़ी दे एह् चाट-चटाई
मेहनत दी तूं करी कमाई
ग़ुरबत-गरीबी चुकाऽ हां मड़ेआ
दिक्ख हां एह्दे नज़ारे मड़ेआ
सौखी मंजल पा हां, मड़ेआ
अमन दी बस्ती आ हां, मड़ेआ
तूं हिरखी डेरा ला हां, मड़ेआ ।
आपूं बने दा मदारी खुआऐं
नौकर तूं ऐ सरकारी भाऐं
बड्डे, उच्चे मैह्ल ते बंगले
अपने बी किश घटाऽ हां मड़ेआ
अमन दी बस्ती आ हां, मड़ेआ
तूं हिरखी डेरा ला हां, मड़ेआ ।
में बी आखां, तूं बी आखैं
नेईं जाना एह् सब किश कन्नै
अग्गें जाने लेई भाई 'कुंडरिया'
जन्नत लेई बचाऽ हां, मड़ेआ
दिक्ख हां एहदे नज़ारे मड़ेआ
फ्ही सौखी मंजल पा हां, मड़ेआ
अमन दी बस्ती आ हां, मड़ेआ
तूं हिरखी डेरा ला हां,मड़ेआ ।.
