रित्तां नमियां, ओह् रंगली आस पर उ’आं दी उ’आं ऐ
मेरे बागैं गुलाबी बास पर उ’आं दी उ’आं ऐ।।
तेरे कन्नै भवैं किश पल अ’म्मीं हस्सी ते बैठा आं
मेरी इक पीड़, मेरी खास, पर उ’आं दी उ’आं ऐ।
हजारां जैह्र पीते, कंठ बेशक पेई गेआ नीला
मेरी जीभा दी मिट्ठी चास, पर उ’आं दी उ’आं ऐ।
भखी दी इक उमरी दी ऐ चिंता-चिख बी मतवातर
चला दी भूत जन एह् लास, पर उ’आं दी उ’आं ऐ।
बत्हेरे लोक पेचे पा ‘रदे न उड़की-उड़कियै
मेरी आसें दी गुड्डी गास, पर उ’आं दी उ’आं ऐ।
परिक्खेआ दे बत्हेरे प्हाड़ तू ढाए न रस्ते च
मेरी तदवीर बाविश्वास, पर उ’आं दी उ’आं ऐ।
…
