एह् साढ़े घरैं
भाडे मांजदियां, सोत-फंड बांह्दियां
अपने घरें दे जालो-खालें नै भरड़ोई दियां
मजबूर औरतां
खिंझें-चुब्भें ते मारा दा
अपने ठुल-ठुल करदे बितै उप्पर
मनें बद्धा भार चुक्की
ढिल्ली टोरा टुरदे
थकेमें नै चूर होई दियां
कि’यां 'क
साढ़े बिंद 'क हिरखी बोल्लैं
अपने पप्पड़ी बज्झे होठें उप्पर
झट लेई औंदियां न मुस्कान
भुल्ली जंदियां न होई-बीतियां
कुसै 'लै घरें दी मालकनें दे खु’ल्ले, खुश मूड उप्पर
झट्ट गै भूतकाल दी घोटमीं ग’ली दी
डोआठन लोआंघियै
वर्तमान दे खु’ल्ले बेह्ड़ै आई चैह्कदियां
खूब गड़ाके लांदियां, मन परचांदियां
अपने घरै दी घ्रैखियें गी चघांदियां
धन्न न
एह् साढ़े घरैं
भाडे मांजदियां, सोत-फंड बांह्दियां
जालो-खालें दे साड़े नै भरड़ोई दियां, चरड़ोई दियां
मजबूर औरतां ।
