मी लगदा ऐ करना पौना जंगल -जाड़ ठकाना मैं
जिस बेह्ड़ै तूं पैर निं धरना ओह् बेह्ड़ा कित लाना मैं !
तीले जोड़े, पर नेईं बनेआ बाग -बड़ूंगै नीड़ मेरा
कदें निं थ्होई टुप्प भरोची चुनेआ दाना दाना मैं ।
रस्ता दिखदे नैन बतोए, कदें ते फेरा पा, सज्जना
लारें-लप्पें एह् पागल मन किन्ना चिर पतेआना मैं !
अनहोनी दे ज़ोर -जबर शा डरना मेरा कम्म नेईं
अग्गी दे लोरें दी भेठा मुड़ियै नीड़ बनाना मैं ।
झूठी बड़ेआई दे बदलै जेह्ड़ा मेरे ऐब गनाs
ओह्दी औंगल फड़ियै चलना, उसगी मीत बनाना मैं ।
पिठ्ठा तीर गै खाद्धे उं'दे, जि'नेंगी छाती लाया हा
कोह्दे मूंढै सिर धरना ते कुसगी दुक्ख सनाना मैं ?
बुल्लैं जंदरे चाढ़ी रक्खे, सि'ल छाती पर अजें बी है
अपनी बरबादी दा आख़र किन्ना सोग मनाना मैं !
इस सराईं धक्के खंदे उमर गोआची ऐ मेरी
चंगा "साजन", दे इजाज़त हून अपने घर जाना मैं ।
