ओदरी दियां धीआं

कदें-कदें 
में अपनी कविताएं दी
कोई परानी कताब खोह्‌लनां
सफें पर सुत्ती दियां  कवितां
उट्ठी बौंह्दियां न
अक्खां मलदियां-मलदियां 
नज़र भरी मिगी दिखदियां न 
ते मिगी पन्छानदे  गै 
झट हांबियै
मेरे गल बांह्‌मां पाइयै
मेरे नै पलमोई जंदियां न
जि’यां 
सौह्‌रे घरै गी बरधाई दियां 
ओदरी दियां धीआं
अपने बाबलै गी दिक्खियै
घोटियै ओह्दे गलै मिलदियां न

कताबें दे सफें  दे बंधनै च
बज्झी दियां 
बिस्सरी जन गेदियां
मेरियां कवितां
अशके , ओदरी दियां धीआं ।