चेता कर हां जदूं में पुच्छेआ
चलगी टिब्बे पार
अदूं खौरै तुगी बी है हा
इश्कै दा बखार
बड़ी तपाकें तूं हा पुच्छेआ
केह् ऐ उस टिब्बे दे पार ?
में गलाया
उस टिब्बे दे पार ऐ सुनेआ, परियें दे उडदे डार
ते पपीहे, चातकें दे उ"ऐ पक्के थाह्र
नील सरोवर जित्थै, कमल खिड़े दे रौंह्दे
उत्थै ते नीले घोड़े, अंबरें उडदे रौंह्दे
रुक्ख निपत्तर उत्थै दे, लोकें निं भाखे
उत्थै निं कोई पतझड़, म्हेशां ब्हारें दे फनाके
आखदे उस वादी दे बोल न मिशरी डलियां
उत्थै मैह्कदियां टैम- बेटैमें चंबे दियां कलियां
दिन खिड़दे मोतिये साहीं, संदली-संदलियां शामां
उत्थै चाननी घुट्टें-घुट्टें पीन नशीलियां ब्हामां
उत्थै दे बसनीक न अड़िये, रूहां तोली लैंदे
सच्चे-सुच्चे दिलें दे लोभी, बाजां मारी बलांदे
उत्थै निं कोई जात-पात, ना गै पंडत-काज़ी
इक्कै शर्त
जे लाई सकचै अस जिंदुआ दी बाजी
जे तूं राज़ी
चल हां चलचै फ्ही टिब्बे दे पार ।
तूं गलाया आ'ऊं बी चलगी, उस टिब्बे दे पार
जित्थै मेरा प्रीतम आखै, उ’ऐ मेरा घार
एह् निक्की जेही ढाबै गी, असें तौले करना पार
पुज्झी जाना ओह्के देस, जित्थै प्यार गै प्यार ।
में हा बिंद हस्सेआ, ते किश कीता बचार
कुतै एह् बखार ते निं, निक्की उमरी दा प्यार
ते में कीता, दो ब’रे होर इंतजार
फ्ही में पुच्छेआ
चलगी टिब्बे पार?
मिगी ऐ चेता जे तूं फ्ही स्हाब हा लाया
अपने स्हाबें जिंदगी दा
केह् होग जे में निं जां, उस टिब्बे दे पार
मिगी ते लब्भा दा मीलो-मील, एह् सुक्के दा जाड़
ठेह् करांदे बट्टे-रोड़े, पेदा कंडें दा खलार
ते आखदे इस जाड़ा च, बिच्चूं,सप्प, गनाह्
उप्पर टीसी पुजदे-पुजदे, जिंद होई जानी स्वाह
में निं जाना टिब्बे पार, में निं पाना फाह् ।
एह् जेठै दियां धुप्पां, बंजर होइयां पौणां
किक्कर, बैरां, औखे पैंडे, कोह्दी छांमां बौह्ना
ते हफे दे भौर ते भौरे, चीकां मारन गटारां
जिंद मेरी फकोई दी, कि’यां छड़प्पियां मारां
हुन निं टुटदे पक्के सौंगल, गिट्टें-गिट्टें सूलां
कि’यां रक्खां वादे-कस्मां, कि’यां पिंजरे तोड़ां
आ'ऊं तेरी ओह् कोयल, अड़ेआ, रली गेई जो कांवां
जि’यां संगड़ोई गेइयां, मेरे गले दियां नाड़ां
हीर स्लेटी होर कोई, तुप्पी लैएआं, अड़ेआ
कम्लाए दा फुल्ल कदें देवतें अग्गें चढ़ेआ !
तूं भाएं मीं आखी लैएआं, कंढियै दी गनाह्
में निं जाना टिब्बे पार, में निं पाना फाह् ।
हुन निं तुगी पुछदा, चलगी टिब्बे पार
हुन निं कुसै गी आखदा, चलचै टिब्बे पार
हुन बसाई लेदा ऐ, तूं इत्थै गै घर-बार
पर इक्क गल्ल, जरूर में चाह्न्नां
तूं बी जान्नी सकैं
में बी कदें निं पुज्झी सकेआ
उस टिब्बे दे पार ।
………………………………………………….
