भारत एह् देस साढ़ा , साढ़ी पन्छान ऐ
असें गै बधाना इ'दा मान, मेरे साथियो ।
कैंको-रौले ज्हारां सदा हौसलें नै स्हारदा
बक्खरी गै इसदी ऐ शान, मेरे साथियो।
न्हेरें इच काफलै जो मेदी भाखां छेड़दे
रोशनी दे थ्होन वरदान, मेरे साथियो।
जश्न मनाने दे , केईं मौके असें देई गे
उं'दे पर वारो जिंद-जान, मेरे साथियो।
अंबरै गी छूह्न जाई कीर्तियां इं’दियां
धरती जे आरती दी थाली, मेरे साथियो
बाडरै प ठंडा-तत्ता सब किश स्हारदे
करदे न वीर रखवाली, मेरे साथियो ।
भांत-भांत रंगे आह्ले फुल्ल इस बागै इच
अस सारे उद्दमी नेह् माली ,मेरे साथियो।
अपने स्वार्थें गी हांबदे जो लोक इत्थै
रक्खनी निं उं’दे नै भ्याली, मेरे साथियो।
भरी दी, भरोची दियें नदियें गी राह् लाओ
साढ़े कश एह् न वरदान, मेरे साथियो
खेतर-खलाड़े दिक्खी लैह्र-बैह्र खुश र'वै
अन्नदाता साढ़ा करसान, मेरे साथियो।
सच्ची-सुच्ची राहें पर अगड़े गै बधना
होऐ समां भाएं बलवान , मेरे साथियो
ढिल्ली नेइयों पौन देनी पग्ग असें देसा दी
इ'यै साढ़ा गौह् ते गमान , मेरे साथियो।
