मता ओचन, मता बखला गै कोई दक्ख लगदे ओ
उ'आं सारें च शामल ओ, प फ्ही बी बक्ख लगदे ओ ।
तुस आए मेह्रबानी, चन्न लग्गे चार मैह्फल गी
एह् तुं'दी शान, जेह्के मैह्फला दा दक्ख लगदे ओ ।
तुसेंगी दिक्खियै छप्पी गेआ न्हेरा जमाने दा
सबूरा चन्न ओ, जो चानना इक पक्ख लगदे ओ ।
फरेब आखां अकल दा जां खता नज़रें दी आखां में
कदें इक बैह्म लगदे ओ, कदें परतक्ख लगदे ओ ।
मुहार अपनी नज़र दी मोड़ने दा किश करो हीला
नशान्ना लाने आह्ली ताड़दी इक अक्ख लगदे ओ ।
एह् दुनिया बी ते कोई ओपरें दी भीड़ आंह्गर ऐ
तुस अपने गै बझोंदे ओ, बगान्ने लक्ख लगदे ओ ।
तुसेंगी दिक्खियै जाङन बतोई लोक अज्ज सारे
बड़े जादूगरें दी भीड़ बिच बी बक्ख लगदे ओ ।
