खबरदार--
आ’ऊं आं चिट्टा-चिट्टा-चिट्टा
आ’ऊं आं दम-घोटू चिट्टा ।
जे चांह्दे ओ कुसै गी मकाना
हसदे-बसदे गी रोआना
जे कड्ढनी कुसै नै दुशमनी
मेरा कम्म, सनै मुंढै पटाना
पौन देओ तुस मेरा खौरा
इक नांऽ मेरा मिट्ठा मौह्रा
मेरी खोऽ पाओ ओह्दे ञयाने गी
बरबादी पेई जाह्ग खिट्टा।
आ’ऊं आं चिट्टा-चिट्टा-चिट्टा
आ’ऊं आं गल-घोटू चिट्टा।
जि’दे प नशीली किरपा करां
उस्सी सुरग नजारे दस्सी देआं
रस्ते सारे बंद में करियै
नाड़ियां बी अंदरा घस्सी देआं
सभनें आह्ला पुट्टियै थेह्
बंदा जा कु’त्थै, करै ते केह्
अपना पराया में नेईं दिखदा
केह् राजू, केह् बिट्टा।
आ’ऊं आं चिट्टा-चिट्टा-चिट्टा
आ’ऊं आं नासकेतु चिट्टा।
चिट्टी धुप्प ऐ चिट्ट-चटैन
तूं चिट्टा दुद्ध पनीर लै
सफे कताबें दे चिट्ट-मचिट्टे
लिखी अपनी तूं तकदीर लै
दिक्ख हां, नशेड़ियें केह् खट्टेआ
देहीं दे भलेखै चूना चट्टेआ
रूह् दिनो-दिन जानी त्रक्की
होई जाना फ्ही भिट्टा।
आ’ऊं आं चिट्टा-चिट्टा-चिट्टा
आ’ऊं आं मूंह्-काला चिट्टा।
नशै गिज्झै नेईं कोई बैरी-दुशमन
आ’ऊं बी इ’ऐ देआं सलाह्
जो बी इस खोब्भे बिच्च धस्सेआ
होआ ओह्दा कदूं भला
गुड़ै इच गलेफियै नेईं ढालो तुस रत्तियां
मेरे शा जरोदियां नेईं मौतां बे-वक्तियां
नमीं पनीरी दूर गै रक्खेओ
जम्मग नरोआ सिट्टा।
आ’ऊं आं चिट्टा-चिट्टा-चिट्टा
आ’ऊं आं बेगुर-पीरा चिट्टा।
