अब्भरें पानियें रोंदे न पक्खरू
खबरै किन्ने घटोंदे न पक्खरू
पिंजरे च जदूं डकोंदे न पक्खरू
रोई-रोई पिंजरा धोंदे न पक्खरू
अब्भरें पानियें रोंदे न पक्खरू ।
दुख कुसै गी सनाई निं सकदे
गीत खुशी दे गाई निं सकदे
निम्मो-झान रौंह्दे न पक्खरू
अब्भरें पानियें रोंदे न पक्खरू ।
गल्ल मनै आह्ली मनै च रौंह्दी
सोचें दी छड़ी काह्ली पौंदी
सोची-सोची बतोंदे न पक्खरू
खबरै किन्ना घटोंदे न पक्खरू
अब्भरें पानियें रोंदे न पक्खरू ।
तांह्गां मनै दियां रेहियां द्हूरियां
कुसने खलानियां मिट्ठियां चूरियां
बिट-बिट दिखदे रौंह्दे न पक्खरू
खबरै किन्ना घटोंदे न पक्खरू
अब्भरें पानियें रोंदे न पक्खरू ।
फिरदा ऐ घोट ते होंदे न नींदरे
जेह्ल बझोंदे न सुन्ने दे पिंजरे
कदें बौंह्दे, कदें ढौंदे न पक्खरू
खबरै किन्ना घटोंदे न पक्खरू
अब्भरें पानियें रोंदे न पक्खरू।
बेरैह्म माह्नुआ नेईं जुल्म कमायां
अजादी उं’दी तूं नेईं छड़कायां
सूंकां सु’ट्टियै रोंदे न पक्खरू
अब्भरें पानियें रोंदे न पक्खरू
खबरै किन्ना घटोंदे न पक्खरू
अब्भरें पानियें रोंदे न पक्खरू
खबरै किन्ने घटोंदे न पक्खरू
पिंजरे च जदूं डकोंदे न पक्खरू
रोई-रोई पिंजरा धोंदे न पक्खरू ।
