शुकर ऐ, में उत्थै नेईं हा
जित्थै टाइटैनिक च ओह् डुब्बे
सुनामी च ओह् रुढ़े
भोपाल च जिं’दे साह् घटोए
शुकर ऐ, में उत्थै नेईं हा
में उत्थै बी नेईं हा
जित्थै लावारस लोथें बश्कार
ओह् बसुर्त पेदे हे
उस भीड़ै च बी नेईं हा
जेह्के स्टेशनें उप्पर
भुक्खे-भाने, तरेहाए
रोग दा लंगर खा दे हे
लम्मे पैंडैं पौने आह्लें च
लू कन्नै भरड़ोए दे
इक लोथ आंह्गर
जेह्के आपूं गै अपने घर
रोग दा परशाद लेइयै जा दे हे
शुकर ऐ, में उत्थै बी नेईं हा
में उस लक्खें दी गिनतरी च बी न हा
जि’नेंगी मौत बेमौती गै निङली गेई
फ्ही में कु'त्थै हा?
ओहो!
में गै ते डुब्बा हा
रुढ़ेआ हा
लावारस लोथें च हा
उस लम्मी बत्ता दे काफले च हा
उस लक्खें दी गिनतरी च हा
में ते उत्थै गै हा
में ते उत्थै गै हा ।
