सम्प्रेषण--
शब्द लिखो तुस, आपूं जो बलोन सज्जनो
अर्थ बिंद बी निं अग्गै-पिच्छै होन सज्जनो
पढ़ियै लाना पवै शब्दें दा जे लाना सज्जनो
ओह् शब्द नेईं जो दुविधा च खड़ोन सज्जनो।
जदूं शब्द तुं’दे अर्थें गी नेईं सकन समझाई
नेईं शब्द तुं’दे गल्ल तुं’दी सकन करोआई
कित्त कारी फ्ही भाषा आह्ला बाह्न सज्जनो
भावार्थें गी जे ढोइयै कुतै सकै नेईं पजाई ।
दुद्ध भावें दा खराब मते बारी होंदा ऐ
गलत शब्दें आह्ला खट्टा जदूं बिच पौंदा ऐ
भाव अपना स्भाऽ फ्ही छोड़ै सारा बदली
शब्द इक बी नेहा जदूं आई बौंह्दा ऐ ।
रक्खो तुस सम्प्रेषण दा ध्यान सज्जनो
देओ हर इक तोल्लियै ब्यान सज्जनो
कन्नै रक्खो तुस सामी भाशा दी त्रक्कड़ी
बोल्लो सोचियै जां र’वो फ्ही म्यान सज्जनो।
जि’यां जिस चाल्ली भाव तुसेंई कन्नै जोड़दा
पजाना उस्सै चाल्ली तुसें दुए धोड़ी लोड़दा
बझोग अंदर लखारी तुं’दै तां गै बैठे दा
असर उ’ऐ नेहा जेकर दुएं पर ऐ छोड़दा ।
भाएं सरल-सधारण लिखो रेहियै होशी, तुस
अर्थ गैह्रा नेईं भाएं रक्खो शब्द-कोशी तुस
म्हत्तव भावें दा निं यारो सम्प्रेषण दा ऐ
जे निं होआ सम्प्रेषण, निं पाठक, दोशी तुस।
