अपनी होंदै इच जदूं बी में घटोआ हा, मड़ो
जीने दे फेरें च मुड़ियै में बन्होआ हा, मड़ो ।
बनेआ हा लहुए दा डोबा ते लखोआ हा, मड़ो
खबरै कैसा वक़्त हा, कंधैं चनोआ हा, मड़ो ।
कद ते शर्तै मताबक में बधाया हा तां फ्ही
की निं में कद्दै दे स्हाबै सिर नपोआ हा, मड़ो ।
खंदे-खंदे, पींदे-पींदे चलेआ गै नेईं मीं पता
ज़िंदगी ,तेरे सुआदैं में खलोआ हा, मड़ो ।
बुनतरां मतियां हियां ,फ्ही बी घुरे चुकदा रेहा
धड़कदा सीनै ओह् की,जो नेईं चकोआ हा, मड़ो ।
ज़िंदगी ,तेरे सुआलें दे में दित्ते हे जवाब
परता,की मेरे सुआलें दा निं थहोआ हा, मड़ो ।
हर मजल पैंडा बनी, इक लक्ष्य बनेआ फ्ही नमां
ज़िंदगी उ’ऐ ते नेईं ,जित्त नेईं पजोआ हा, मड़ो ।
आखेआ जो किश हा में, उसगी ते भोगी गै लेआ
चारै,उ’ऐ की चरै,जो किश निं खोआ हा, मड़ो ।
