ऐनक जतुं दूरै आह्ली
नमीं-नमीं लग्गी
तां किन्ने गै साल
नेईं बनी मेरी ओह्दे नै
ओभड़ लगदा ही मिगी --
दो अक्खीं होंदे
दो होर लाना
ऐह्में जानी उस्सी मुंहै पर सजाना।
रुलदी रौंह्दी ही बचैरी
थांह्-कथांह्
दिखदी रौंह्दी मेरै आस्सै
बिटर-बिटर, हीखी लाइयै
जि’यां दिखदी ऐ कोई ब्याह्ता
अपने सिरै दे साईं पास्सै
जेह्ड़ा रखदा नेईं रौं
ओह्दे नै मास्सा बी।
कदें-कदालें चेता
औंदा हा मिगी ओह्दा,
बझोंदा थकेमां अक्खीं गी
जां पौंदी ही जे रड़क कुतै।
इक-इक करियै, जि’यां ब'रे
इतिहास होंदे गे
नजरी दी आकड़ बी
नित घनी होंदी धूरै इच बलीन होई गेई।
हून
नेईं रौह्न होंदा
अपनी ऐनकै बगैर
जेकर कुतै रक्खियै
भुल्ली जां
तां चुक्की लैन्नीं सिरै पर
पूरा घर।
कदर पौंदे
किन्ना वक्त लग्गी जंदा ऐ !
