ओह् कुʼन ऐ
जेह्ड़ा सारे फुल्लें दे रंग ते खश्बो
चराइयै लेई गेआ ऐ
ते साढ़े बागें गी वीरान करियै
ओह्दे च कंडे बछाई गेआ ऐ
लोकें दे हक्कें पर डाका मारियै
मेदें गी ल्हुलुहान करियै
तड़फदा छोड़ी गेआ ऐ
स्याह् काली रातें च
अक्खीं टड्डे दे
पिंज्जर जन बिलखदे ञ्यानें दे ढिड्डें च
भुक्खां भरी गेआ ऐ
आसें गी ग्रैह्न लाई गेआ ऐ
साढ़ी सदियें दी सांझी कदरें गी
सिनक लाइयै
अंदरो -अंदरी खोखला करी गेआ ऐ
ते सनैह्रे भविक्ख पर
कालख पोची गेआ ऐ
क्या ओह् साढ़ा दोहार लेदा
नकारा नजाम ऐ
जेह्ड़ा किसै कारी दा नेईं
ते उल्टा जनता दा शोशण करा दा ऐ
क्या ओह् साढ़े तंग ते निक्की सोच आह्ले
सफेदपोश रैह्बर न
जेह्ड़े सेवा-भावना त्यागियै
खुदगरजी ते बेइमानी दियां
सारियां हद्दां पार करी गेदे न
जां फ्ही ओह् आम आदमी
आपूं गै ते नेईं
जिʼन्नै अपने हत्थ बड्ढियै
इʼनेंगी देई ओड़े दे न
ते आपूं मस्त होइयै
गूढ़ी नींदरै च सेई गेदा ऐ ।
