जगह-जगह टोल प्लाज़े ला करदी सरकार ऐ
मंग्हाई बी सिर चढ़ी दी, ना कोई कारोबार
कि’यां बचना, कु’न्न बचाना, होई गेई तारो-तार ऐ
जगह-जगह टोल प्लाज़े ला करदी सरकार ऐ ।
हुन घरें च रोना-धोना, रोज लड़ाई पेदी ऐ
ना दाल, ना सब्जी-आटा, खंड बी मुक्की गेदी ऐ
सुक्के फुल्के कि’यां खाने, मुक्की गेदा चार ऐ
जगह-जगह टोल प्लाज़े ला करदी सरकार ऐ ।
बड़े दलासे दिंदे आइयै, गरीबी असें मटानी ऐ
घर-घर असें रोशन करना, भुक्ख-त्रेह् चकानी ऐ
इ’नें गै साढ़े सौदे करियै बेड़ा करना पार ऐ
जगह-जगह टोल प्लाज़े ला करदी सरकार ऐ ।
बस-कंडक्टर, हट्टी आह्ले, हर कोई होआ लचार ऐ
माह्नू इक कमाने आह्ला, टब्बरा दा पूरा भार ऐ
बाह्रा एह् टकोरां लांदे, अंदरा दा गुज्झी मार ऐ
जगह-जगह टोल प्लाज़े ला करदी सरकार ऐ ।
आनलाइन असें बच्चे अपने कि’यां करी पढ़ाने न
रीचार्ज मोबाइल कराना, पैसे कु’त्थुआं औने न
बिजली-पानी दा बकाया, करोना दी पेदी मार ऐ
जगह-जगह टोल प्लाज़े ला करदी सरकार ऐ ।
