साढ़ा हिरख
बरसाती तौहै आंह्गर
शैल सूंकेआ
शैल फूंकरेआ
ते
शैल नशर होआ
केह् दस्सां, जिंदे
केह् हशर होआ !
फट्टेआ जुआनी दा बद्दल
खु’ल्ली पेइयां
पानी दियां लद्दां
ते फ्ही,
भौडां,लांझां ते छल्ल
कदें उप्पर, कदें ख'ल्ल
लेई गे रोढ़ियै
साढ़ियां खाह्शां
साढ़ियां चाह्तां
साढ़ियां आसां ।
किज होआ बरलोका
पेआ तांह्गैं सोका
खरक लग्गे दे कंढे
घोखै करदे हे
साढ़े हिरखै दी रवान्नी गी
साढ़ी अ'न्नी जुआनी गी
साढ़ी द्हूरी क्हानी गी
साढ़ी हास्सोआनी गी ।
बस !
इक चुप्पी ही साढ़े बशकार
तू ही
उस कंढे पार
ते में
इस कंढे आर
एह् कंढे
हून कदें नेईं हे मिली सकदे
ओह् बरसांत गै सुक्की गेई
इक्क -मिक्क होने दी
हीखी मुक्की गेई।
मेरिये साथने,
हुल्ल पेई गेई
हूस लेई गेई!
बस !
इन्नी गै ही खेढ अपनी
इन्ना गै हा तमाशा
जोवन मरी-भुरी गेआ
जि'यां पानी च पतासा ।
