यूटी अंदर मच्छर-बिड़ी डंग लगे न लान
सारै इ’नें घेरा मारी कीता ऐ परेशान
ग्राएं, पिंडैं, शैह्रैं, बजारैं बस्से बेशमार
टीके लाइयै चाढ़न बिस्स, कन्नै निग्गर बखार
मच्छरदानी अंदर बड़ियै सूहा गुट्ट लशकान
सारै इ’नें घेरा मारी कीता ऐ परेशान ।
चूंह्कैं, गैह्लै, चबारैं उड्डन तक्कां पांदे जान
झत्ती चढ़ै माह्नू इं’दी भरी-भरी डंग लान
भूं-भूं करदे सारै दौड़न , रात होऐ, दपैह्र
सुत्तनींदरा त्रुंबी जंदे सूआ भरी जैह्र
डेंगु मच्छर सुरां लाइयै कन्नैं गीत सनान
सारै इ’नें घेरा मारी कीता ऐ परेशान
यूटी अंदर मच्छर-बिड़ी डंग लगे न लान ।
पंचायत घर बक्ख उड्डा दे ,अपना जाल बछान
जे कोई मुशकल दस्सन जा, क्याड़ी चमकी जान
डंगी जा दे हर माह्नू गी डेंगु मच्छर पापी
खु’ल्ल-मखुल्ले एह् फिरा दे , छुड़दे नेईं खलासी
नेआबत-तसीलैं घुरी-घुरियै त्रुंबी जाला पान
सारै इ’नें घेरा मारी कीता ऐ परेशान
यूटी अंदर मच्छर-बिड़ी डंग लगे न लान ।
तम्हूड़ी, रियूंगल रिश्ते इच्च न इं’दे भैन-भ्राऽ
बिच्चू इं’दा फुफ्फड़ लगदा, डंगी नस्सी जाऽ
बापू इं’दा डेह्ल्ले कड्ढी फिरै रौब जमानै
बुआ इं’दी पार्कैं फिरै, मामा उड्डै थानैं
चाचू इं’दा डंग लाइयै नस्सी चढ़ै शमान
सारै इ’नें घेरा मारी कीता ऐ परेशान
यूटी अंदर मच्छर-बिड़ी डंग लगे न लान ।
पानी कंढै, उप्पर दिक्खो इ’नें जाल बछाया
बिजली दफ्तर, टोल प्लाज़ै नाका निग्गर लाया
त्रै सौ माह्नू होए न दिक्खो डेंगु दे शकार
जालमें कोला जिंद बचानी, कन्नै परिवार
नानी इं’दी बक्ख फिरा दी लोरियां कन्नै सनान
सारै इ’नें घेरा मारी कीता ऐ परेशान
यूटी अंदर मच्छर-बिड़ी डंग लगे न लान ।
रस्तै मच्छर पिच्छें लग्गी आखन करो बसांऽ
दादा मच्छर घूरियै बैठा कु’स्सी टीका लां
पुत्तरै इं’दा बाईं पर उड्डै लेइयै संगी-साथी
नाड़ुएं हेठ न्हौन बौह्चै, पूरी डंगी छाती
लाई बमारी असेंगी इ’नें, तुपचै हुन मसान
सारै इ’नें घेरा मारी कीता ऐ परेशान
यूटी अंदर मच्छर-बिड़ी डंग लगे न लान ।
मच्छरें कशा जान बचाओ, की पिच्छें लग्गे न पापी
डंगें कन्नै चढ़ी खमारी, बचेआ केह् हुन बाकी
कादिर कुंडरिया अर्ज करै हुन डेंगु कोला बचाओ
सुद्धे असें डंग जरे न, मल्हम-पट्टी लोआओ
सब्भै रलियै डेंगु मच्छर घर-घर मारी मकान
सारै इ’नें घेरा मारी कीता ऐ परेशान
यूटी अंदर मच्छर-बिड़ी डंग लगे न लान ।
………………………….
