जित्थै मानवता जा मुक्की
हिरख दी पैली रौंह्दी सुक्की
प्रेम सरै नेईं जेह्के न्हाते
उ’नें निं जीवन भेत पछांते
जित्त निं आतम आतम जुड़दा
उस थाह्रा साह्-साह् ऐ कुढ़दा
सुंघड़ी सोचें दा जित्त घेरा
मनु-मनु च जित्त फेरा
उस थां हर कोई एह् आखै
केह् रिश्ता ऐ तेरा मेरा ?
सरबंधें दी सौंगल त्रुट्टै
उत्थै मिलन दा चाह् सब हुट्टै
इक दुआ अत्त दूर सनोचै
साह्-साह् दे बिच्च घुटन भरोचै
नैन कुसै तांईं नेईं बलगन
हिरख भरोचे चाह् नेईं सुलगन
बक्खरा लग्गै हर कोई चेह्रा
बे-पन्छानू चढ़ै सवेरा
उस थां हर कोई एह् आखै
केह् रिश्ता ऐ तेरा मेरा ?
मनै सुआर्थ जद् सिर चुक्कै
इक दुए दा आदर मुक्कै
धन दौलत गै जित्थै बोल्लै
मूंह् दिक्खी रिश्तें गी तोलै
मनै हंकार जतांह् ऐ बड़दा
कु’न डुबदे दी बांह् ऐ फड़दा
में-में दा ऐ जित्थै डेरा
घ्रिना दा बद्दल चढ़ै घनेरा
उस थां हर कोई एह् आखै
केह् रिश्ता ऐ तेरा मेरा?
जीवन दी बुनतर जो रुज्झा
आतम तत्त ओह् रौंह्दा गुज्झा
पिंड तां बनदे भजदे रौंह्दे
अमर भला कीऽ देह् समझोंदे
संसारी सब मोह् बिच्च बज्झे
गूढ़ तत्त सब रौंह्दे कज्जे
सोचैं पस्सरै जित्थै न्हेरा
सच्च कदें निं होऐ बंदेरा
उस थां हर कोई एह् आखै
केह् रिश्ता ऐ तेरा मेरा?
पल-पल रौंह्दे औंदे-जंदे
एह् पल नेइयों कदें बन्होंदे
प्राणें दा बी एह् सरिस्ता ऐ
पल प्राणें दा पक्क रिश्ता ऐ
पल आए तां प्राण बी सुरके
प्राणें कारण साह् हे गुड़के
समझै नेईं गल्ल गूढ़ एह् जेह्ड़ा
उत्थै पौंदा नित्त बखेड़ा
उस थां हर कोई एह् आखै
केह् रिश्ता ऐ तेरा मेरा ?
जद् मन जकड़े सोच एह् खोह्ल्लै
स्रिश्टी दा विस्तार फरोलै
अणु कारण स्रिश्टी दी एह् रचना
इस कन्नै सब जुड़ना टुट्टना
इक जोत इक साह् सब हंडन
फ्ही मन-मन रिश्ता की बंडन
बिच्च जीव ऐ प्राण बसेरा
जित्थै नेईं एह् सोच उचेरा
उस थां हर कोई एह् आखै
केह् रिश्ता ऐ तेरा मेरा
इक कारण उपजै जगताई
चेह्रै डलकै हुसन खुदाई
नंद-सरै मन ठाठां मारै
कमल खिड़ी जा बिच्चा गारै
प्रेम रमैं जन-जन दे गब्भै
जोती दि’ब्ब जगी दी लब्भै
संभी जा सब घेर-म-घेरा
सम रस होई जा चार-चफेरा
उस थां हर कोई एह् आखै
अमर ऐ रिश्ता ऐ तेरा मेरा
अमर ऐ रिश्ता ऐ तेरा मेरा।
