हाल्ली मसां सवा साल क होआ जे में हा जम्मेआ
सुद्ध-बुद्ध बी नेईं आई माऊ-बब्बै ने कायदा थ’म्मेआ ।
चुक्की-चुक्की मिगी हाल्ली शैल चाल्ली नेईं फेरेआ
‘ए’ ऐप्पल ते ‘बी’ बैट नै सने टब्बरै आई मिगी घेरेआ
नां लोरियां, नां टोरियां ओहो, प्रभु कु’त्थै आई फसाया
भाएं लाड्डें-लाड्डें गै सेही ब सारें गै मिगी ढाया
जमदे गी पढ़ाया समाजै ने एह् पक्का रवाज बन्नेआ
हाल्ली मसां सवा साल क होआ जे में हा जम्मेआ
सुद्ध-बुद्ध बी नेईं आई माऊ-बब्बै ने कायदा थ’म्मेआ ।
क, ख, ग, घ ते ङ लेइयै झटपट गै आई हिंदी
सोचेआ चुकदी चाची ब उब्भी लेआई गिनती
बक्खरी-बक्खरी बोल्लियें सुझांदे अश्कै अ’ऊं ज्ञानी होन्नां
घसूचड़ियां ते दूर ब हाल्ली में भुञां निं बौह्न्नां
सारे टब्बरा च मिगी पढ़ाने लेई लग्गी दी ऐ रीस
इन्ना किश सिक्खने तांईं मेरे गोड्डे च नेइयूं ग्रीस
इन्ना बोझ पाई-पाई मेरा निक्का जेहा दमाकू भन्नेआ
हाल्ली मसां सवा साल क होआ जे में हा जम्मेआ
सुद्ध-बुद्ध बी नेईं आई माऊ-बब्बै ने कायदा थ’म्मेआ ।
लौह्का चाचू थोह्ड़ी मेरे नै हिरख हमदर्दी दसदा
पर चुक्कियै उब्भी सिद्धा अंबरै गी सु’टदा
ग्रेट्ठ अ’ऊं ते कन्नै कुंगली-कुंगली ल’त्त-बांह् मेरी
कुतै धरकोई निं जाs डरी-डरी मेरा दम घुटदा
राती-बराती मेरा त्राह् निकलदा तां अ’ऊं रोन्नां
रंग डुआंदे दिक्खी लगदा हून मिगी सूआ चुभोन्ना
सच्चे गै सारे सलाह्-सूत्तर करदे डाक्टरै दे जन्नेआं
हाल्ली मसां सवा साल क होआ जे में हा जम्मेआ
सुद्ध-बुद्ध बी नेईं आई माऊ-बब्बै ने कायदा थ’म्मेआ ।
गल्ल इत्थै गै नेईं मुकदी जरो इं’दी इक-डेढ
तौलै गै मेरे गले च आई पेई बन्न-सबन्नी खेढ
बैट. हाकी, बैडमिंटन ते कोई मिगी कराs जिम्मनास्ट
सारे रकार्ड भन्नने जि’यां मेरे शा नेईं कोई फ़ास्ट
भुल्लें-भलेखें कुतै मेरे शा लग्गी जाs सरीखी शाट
ख़ुश होंदे, पाह्लां पांदे मसूसदे मेरी गै हिरखी ठाट
मेरे रंगती रोंदू भावें सारे गै टब्बरै गी रम्भेआ
हाल्ली मसां सवा साल क होआ जे में हा जम्मेआ
सुद्ध-बुद्ध बी नेईं आई माऊ-बब्बै ने कायदा थ’म्मेआ ।
आंटी पुछदी, माई लिटल सन् तेरी नोजी कु’त्थै ऐ
अ’ऊं शारे कन्नै पुच्छनां, मेरी दुद्ध दी बोतल कु’त्थै ऐ
बिज़न सोचें-समझे खुश होंदी जे में जवाब दित्ता ऐ
रली-मिलियै सारें गै मिगी अद्ध शदाई कीता ऐ
शैल चाल्ली फलन-फुल्लन देचै जेकर एह् सोचन
कि’यां तेज-तरार ते चलाक बनां ज़रा अपने आपै गी खरोचन
त्र’ऊं-च’ऊं ब’रें तक्कर पैह्ले दुद्ध खुराक शैल दिन्ने आं
हाल्ली मसां सवा साल क होआ जे में हा जम्मेआ
सुद्ध-बुद्ध बी नेईं आई माऊ-बब्बै ने कायदा थ’म्मेआ ।
