ब्हादर बड़ी कौम ऐ मेरी
लहुऐ इच ईन बथ्हेरी
त्रुट्टी भांए जान, झुकन नेईं
जोरे दी चलै जो न्हेंरी
डरदे नेई कदें बी दलेर डोगरे
तांइयैं ते खोआंदे बब्बर शेर डोगरे।
-चलदे नै आकड़ियै एह् ऐ
करियै चंगी चौड़ी छाती
दिक्खेन गी लब्भन भोले
जम्मेआ कु’न इं’दी राती
चंगें कन्नै चंगें न
ते माड़े कन्नै माड़े न
देसा नै प्रेम आह्ले
रंग इं’दे गाढ़े न
करदे निं कदे तेर-मेर डोगरे
तांइयैं ते खोआंदे बब्बर शेर डोगरे।
बडी़ गै उपजाऊ धरती
सभनें गी पालै-पोसै
मेह्नत दी खंदे खट्टी
रौंह्दे नेईं भाग भरोसै
अपने तेहार न इं’दे, बक्खरे गै ढंग न
पवा दा ऐ कुड्ड कुतै, छिंजैं दड़ीजंग न
जरदे नेईं उन हेर-फेर डोगरे
तांइयैं ते खोआंदे बब्बर शेर डोगरे।
डुग्गर दी नींह् तुस नापो
डीडो दी तलोआरी ने
हक्कै ताईं मरो, सखाया
जित्तो दी गै कटारी ने
कुंजु-चैंचलों न उत्थै
जित्थै गिल्मू ते भागां
थ’म्मै कि’यां करी कोई
इं’दी हिरखी लोआघां
दिल लाने इच बी अग्गें
सवा सेर डोगरे
तांइयैं ते खोआंदे बब्बर शेर डोगरे।.
