कु'न मिगी ऐ आखदा, थ’म्मी लैं गास में
उच्ची डोआरी मारियै, चुम्मी लैं कलाश में।
कु’न मिगी ऐ आखदा, पैंछियें दा गीत में
बद्दलें च जो गरजै दा, सुन्नै दा संगीत में
कु’न मिगी ऐ आखदा, सिरजन में, नास में
कु'न मिगी ऐ आखदा, थ’म्मी लैं गास में ।
चन्न, सूरज बलै दे, सब्भै मेरे तेजै नै
तारे करोड़ां चला दे, सब्भै मेरे आदेशै नै
कु’न मिगी ऐ आखदा, पुंज आं परकाश में
कु'न मिगी ऐ आखदा, थ’म्मी लैं गास में ।
दिक्खा दा जो अक्खें च, मांस पिंडै बस्से दा
उस प्राण दा बी प्राण आं, जि’दा ऐ जादू रचे दा
कु’न मिगी ऐ आखदा, फुल्लें च सुवास में
कु'न मिगी ऐ आखदा, थ’म्मी लैं गास में ।
चौनें पास्सै ढोलै दा, गले-गले च बोल्लै दा
सागरें दा नीर में, ज्वालामुखी च खौलै दा
कु’न मिगी ऐ आखदा, साधकें दी प्यास में
कु'न मिगी ऐ आखदा, थ’म्मी लैं गास में ।
उद्घोष कर अनअलहक, की पक्के किल्लैं बज्झे दा
हुंकार भर, में ब्रह्म आं, ऐह्वें गै सब कज्जे दा
कु’न मिगी ऐ आखदा, फ्ही कोह्दी तलाश में
कु'न मिगी ऐ आखदा, थ’म्मी लैं गास में ।
