सादे—
अस सिद्धे-सादे खुआई लैन्नें
हर बाद्धे रुहैं बसाई लैन्नें
साढ़ी मुंढा थमां गै एह् तसीर
अस दित्ते जखम भलाई लैन्नें
अस सिद्धे-सादे खुआई लैन्नें।
नेईं आखचै अस माड़ी गल्ल
हर मुशकल दा अस कढचै हल्ल
मिलियै दुख-सुख टपाई लैन्नें
हर बाद्धे रुहैं बसाई लैन्नें
अस सिद्धे-सादे खुआई लैन्नें।
अपने हक्क छुड़ी-छुड़ियै
गिले निं करचै मुड़ी-मुड़ियै
धमकी बी सीन्नै लाई लैन्नें
हर बाद्धे रुहैं बसाई लैन्नें
अस सिद्धे-सादे खुआई लैन्नें।
सुद्धा सोआद लाई-लाइयै
रुक्खी-सुक्की खाई-खाइयै
फ्ही खुशियां मनै नै लाई लैन्नें
हर बाद्धे रुहैं बसाई लैन्नें
अस सिद्धे-सादे खुआई लैन्नें
साढ़े ब’रके कोरे रेही जंदे
एह् भुञां सदा मलोई जंदे
फ्ही बी हौसले उगाई लैन्नें
हर बाद्धे रुहैं बसाई लैन्नें
अस सिद्धे-सादे खुआई लैन्नें।
हर दिलै च हिरख बसाई लैचै
चल ‘कुंडरिया’ पौंगरां पाई लैचै
एह् फसलां हुन उगाई लैन्नें
हर बाद्धे रुहैं बसाई लैन्नें
अस सिद्धे-सादे खुआई लैन्नें।
